काठमाडौं । प्रधानन्यायाधीश चोलेन्द्र शमशेर जबराविरुद्द आन्दोलनरत नेपाल बार एसोसिएसनले आज मंगलबार पनि आन्दोलन जारी राखेको छ ।

तिहार सकिएलगत्तै सोमबारबाट दोस्रो चरणको आन्दोलनलाई निरन्तरता दिएको बारले प्रधानन्यायाधीश जबराकाबारेमा गम्भीर बन्न राजनीतिक दलहरूलाई आह्वान समेत गरेको छ ।

सर्वोच्च परिसरमा कालो पट्टी बाँधेर विरोधमा उत्रिएका बार पदाधिकारी र सदस्यहरूले दैनिक धर्ना दिँदै आएका छन् । तर, प्रधानन्यायाधीश जबराले बारको आन्दोलनलाई वेवास्ता गर्दै मंगलबारबाट सबै मुद्दाको सुनुवाइका लागि इजलास गठन गरेका छन्।

आफ्नो इजलासमा सातवटा विवाद सुनुवाइका लागि तय गरेका जबराले १० वटा इजलास गठन गर्दै २९८ मुद्दा सुनुवाइका लागि पेसी तोकेका छन् । यसअघि उनले बन्दीप्रत्यक्षीकरणका रिट सुनुवाइका लागि मात्र इजलास तोक्दै आएका थिए।

सबै मुद्दामा इजलास गठन गरेको भन्दै जबराको राजीनामा माग्दै आएका न्यायाधीशहरूले भने मुद्दा सुनुवाइमा सहभागी नहुने बताएका छन् ।

प्रधानन्यायाधीश जबराले कार्यपालिकामा भाग खोजेको, न्यायिक सुधार गर्न नसकेकोलगायतका आरोप लगाउँदै सर्वोच्च अदालतका १९ जना न्यायाधीशसहित नेपाल बार एसोसिएसन आन्दोलनरत रहेको छ।