काठमाडौँ । तोकिएको परिमाण भन्दा बढी रक्सी ल्याउन नपाउँदा कर्मचारी कुट्ने पर्यटन बोर्डका प्रमुख कार्यकारी अधिकृत (सीईओ) धनन्जय रेग्मीलाई ५ हजार जरिवाना गरिएको छ। साथै उनले ल्याएको बढी रक्सी पनि जफत गरिएको छ ।

भाइटीकाको दिन बिहान लन्डनबाट नेपाल आएका सीईओ रेग्मीले नियम विपरीत ६ वटा रक्सीका बोतल ल्याएका थिए ।

उनले ड्युटी फ्रीबाट रक्सी तोकेभन्दा धेरै ल्याएको भेटिएपछि विमानस्थलमा कार्यरत भन्सारका नासु सुमन थापाले रोकेका थिए ।

चेकजाँचका क्रममा थापाले ६ बोतल मदिरा देखेपछि साथमा कतिजना हुनुहुन्छ भन्दै रेग्मीलाई सोधेको र प्रश्न सुन्नेबित्तिकै रेग्मीले थापामाथि हातपात गरेका थिए।

भन्सार ऐन अनुसार विदेशबाट फर्किनेले प्रतिव्यक्ति १ लिटर मदिरा ल्याउन पाउँछ । तर, ५ बोतल बढी भएपछि रेग्मीलाई ५ हजार रुपैयाँ जरिवाना गरिएको हो।

लामो समयदेखि विवादमा रहँदै आएका रेग्मीलाई नेकपा एमालेका नेता योगेश भट्टराईले आफू पर्यटनमन्त्री भएका बेला बोर्डको सीईओमा नियुक्त गरेका थिए।