काठमाडौँ । वरिष्ठ अधिवक्ता शम्भु थापाले प्रधानन्यायाधीश चोलेन्द्रशमशेर जबरा असफल भएको बताएका छन् ।

आइतबार प्रधानन्यायाधीश जबराको राजीनामा माग गर्न नेपाल बार एसाेसिएसनले आयोजना गरेकाे धर्नापछि संचारकर्मीहरुलाई संक्षिप्त प्रतिक्रिया दिँदै अधिवक्ता थापाले संवैधानिक प्रक्रियाअनुसार प्रधानन्यायाधीश राणा असफल भइसकेको बताए।

यस्तै, अधिवक्ता थापाले प्रधानन्यायाधीश जबराले आफ्नो कामको मूल्यांकन आफैँ गर्न नसक्ने भए पूर्वप्रधानन्यायाधीशहरूको एउटा इजलास गठन गर्न पनि चुनौती दिएका छन्।

‘यदि तपाईं आफ्नो कामकारबाहीको मूल्यांकन गर्न सक्नुहुन्न भने पूर्वप्रधानन्यायाधीशहरूको एउटा इजलास गठन गरौँ। तपाईं एकातिर हामी एकातिर उभिन्छौँ, अनि थाहा भइहाल्छ। हामी राजनीतिक दललाई गुहार गर्दैनौँ,’ थापाले भने।

यता, सर्वोच्च अदालतमा इजलास बन्द गर्न नहुने र इजलास सुचारुको माग गर्दै रिट दर्ता गर्न सर्वोच्च पुगेका कानुन व्यवसायी र सर्वसाधरणलाई प्रहरीले लखेटेको छ।

प्रहरीले करिब ४० जना कानुन व्यवसायीसहित सर्वसाधारणहरुलाई लखेटेर माइतीघर पुर्‍याएको स्रोतले जानकारी दिएको छ।

स्रोतका अनुसार रिट दर्ता गर्न सर्वोच्च पुगेका सेवाग्राहीहरुलाई प्रहरीले लखेटेर माइतीघरतिर पुर्‍याएको हो। उनीहरुले इजलास बन्द गर्न नहुने र न्यायाधीशहरुले सर्वसाधारणको समस्या बुझेर काम फर्किनुपर्ने माग गरेका छन् ।