सोलुखुम्बु । प्रहरी महानिरीक्षक (आईजीपी) शैलेश थापा क्षेत्रीले प्रहरी संगठनबाट सम्पादित कार्य न्यायोचित, कानुन सम्मत र विवेकपूर्ण हुने बताएका छन् ।

शुक्रबार इलाका प्रहरी कार्यालय नाम्चेको नवनिर्मित कार्यालय भवनको उद्‍घाटन गर्दै आईजीपी क्षेत्रीले यस्तो बताएका हुन्।

समारोहलाई सम्बोधन गर्दै आईजीपी क्षेत्रीले प्रहरीको कार्य प्रकृतिको संवेदनशीलताले गर्दा प्रहरी भवनहरूको फरक आवश्यकता र सुरक्षा मापदण्ड हुने बताए ।

यस्तै, आईजीपी क्षेत्रीले देशी विदेशी हरेक मानवजातिको लागि आकर्षणको केन्द्र रहेको सगरमाथा क्षेत्रमा हुन सक्ने अपराधहरू रोकथामको लागि नागरिक र प्रहरीबीचको समन्वय र सहकार्य अत्यन्त महत्वपूर्ण रहने बताए।

सगरमाथा राष्ट्रिय निकुञ्जबाट हुन सक्ने अवैध चोरी निकासी पैठारीको विषयमा पनि उत्तिकै सजग र सचेत रहनु पर्नेमा आईजीपीले जोड दिए।

कार्यक्रममा आईजीपी क्षेत्रीले पहिलो पटक सगरमाथा आरोहण गर्ने आरोहण दलका सदस्य ९४ वर्षीय कान्छा शेर्पालाई अभिनन्दन समेत गरेका थिए।