सोलुखुम्बु । प्रहरी महानिरीक्षक (आईजीपी) शैलेश थापा क्षेत्रीले प्रहरी कर्मचारीहरुलाई आफ्नो आचरण र व्यवहारमा शुद्धता कायम गर्न निर्देशन दिएका छन्।

बुधबार ईलाका प्रहरी कार्यालय लुक्लामा नवनिर्मित कार्यालय भवनको उद्‍घाटन गर्दै आईजीपी क्षेत्रीले आमनागरिकहरुका लागि प्रहरी कर्मचारीहरूको व्यवहार र बोलीवचन सदैव उत्कृष्ट हुनुपर्नेमा जोड दिए।

आईजीपी क्षेत्रीले निष्पक्ष र सेवामुखी भावनाका साथ आफ्नो आचरण र व्यवहारमा शुद्धता कायम गर्न समेत प्रहरी कर्मचारीहरुलाई निर्देशन दिएका छन्। साथै, आईजीपी क्षेत्रीले सदैब जनसमुदायको सेवा र सुरक्षामा गम्भीर भएर काम गर्न समेत प्रहरी कर्मचारीहरूलाई निर्देशन दिए ।

फरक प्रसंगमा लुक्लावासीसँग साक्षात्कार गर्न पाउँदा आफूलाई गौरव महशुस भएको उल्लेख गर्दै आईजीपी क्षेत्रीले पर्यटकहरूको सुरक्षाप्रति प्रहरी कर्मचारीहरू विशेष सजग र संवेदनशील हुनुपर्ने बताए।