काठमाडौं । महानगरीय प्रहरी अपराध महाशाखाले गैंडाको खागसहित दुई जनालाई पक्राउ गरेको छ।

पक्राउ पर्नेहरुमा सोलुखुम्बुको दूधकोशी गाउँपालिका ६ का १९ वर्षीय तिलकबहादुर बस्नेत र बागलुङको तमनखोला गाउँपालिका १ का २८ वर्षीय दीपक गोतामे रहेका छन्। उनीहरुको साथबाट प्रहरीले ९७० ग्राम तौल भएको १ थान गैँडाको खाग बरामद गरेको जनाएको छ।

अवैध रूपमा ओसारपसार गरी ल्याएको दुर्लभ वन्यजन्तु गैंडाको खागको कारोबार भइरहेको गोप्य सूचनाका आधारमा उनीहरुलाई महाशाखाको टोलीले काठमाडौंको गैरीगाउँबाट पक्राउ गरिएको प्रहरीले जनाएको छ ।

पक्राउ परेका उनीहरुलाई थप अनुसन्धानको लागि जिल्ला वन कार्यालय हात्तीसार काठमाडौं पठाइएको महाशाखाले जनाएको छ ।