एजेन्सी । संयुक्त अधिराज्यको राजधानी लन्डनको पश्चिमतिर पर्ने बर्कशायरका एक व्यक्ति आफ्नो बगैँचामा सुस्ताइरहेका बेला अनौठो घटना भयो।

उनीमाथि र बगैँचाभर एउटा विमानबाट खसालिएको मानव मलमूत्र ‘नरमाइलो तरिकाले छरपस्ट भयो।’

त्यो घटना गत जुलाई महिनाको मध्यतिर भएको थियो । तर अहिले स्थानीय तह- काउन्सिलको बैठकमा छलफल भएपछि बल्ल त्यो घटना चर्चामा आएको छ।

द रोयल बरो अफ विन्सर एन्ड मेडनहेड्स एभिएशन फोरमको बैठकमा बोल्दै काउन्सिलर क्यारन डेभिसले आफूलाई एक जना स्थानीय बासिन्दाले सम्पर्क गरेर कसरी उनको बगैँचा, बगैँचामा राखेको ठूलो छतरी र उनी आफैँ मलमूत्रमा परे भन्ने घटना बारे जानकारी दिएको बताइन्।

के भएको थियो ?

ती व्यक्ति विन्सर भन्ने शहरमा बस्छन् । त्यही बाटो हुँदै विमानहरू लन्डनको पाँचमध्ये सबभन्दा ठूलो विमानस्थल हिथ्रोतर्फ लाग्छन्। ‘हरेक वर्ष विमानबाट हिउँ झैँ जमेको मलमूत्र झर्ने घटनाहरू हुने गरेको मलाई थाहा छ,’ डेभिसले भनिन्, ‘तर यो घटना त असाध्यै नरमाइलो तरिकाले भएको पाइयो।’

‘उनी आफ्नो बगैँचामै भएका बेला त्यस्तो हुनु त असाध्यै नराम्रो अनुभव भयो । शायद त्यस्तो फेरि कसैलाई नहोला।’ अर्का काउन्सिलर जन बाउडेनले त्यसलाई ‘एक अर्बमा एक पटक हुनसक्ने सम्भावना भएको’ घटना भनेका छन्।

न्यानो मौसमका कारण पनि त्यो मलमूत्र त्यसरी तरल अवस्थामा तल झरेको हुनसक्ने उनी ठान्छन्। (बीबीसीको सहयोगमा)