काठमाडौं ।  भारतको नेशनल डिफेन्स कोर्स–२०२१ का सदस्यहरुले सैनिक मुख्यालयमा मंगलबार भेटवार्ता गरेका छन् ।

सैनिक मुख्यालयमा आयोजित कार्यक्रममा प्रधानसेनापति प्रभुराम शर्माले भ्रमण दलका प्रमुख धिरेन भिगसँग आफ्नो कार्यकक्षमा शिष्टाचार भेटवार्ता गरे । असोज ३१ गते सैनिक टोली नेपाल आएको हो ।

प्रधानसेनापति शर्माले भिगसँग भेटवार्ता गरेका थिए । प्रधानसेनापति शर्माले दुई मुलुकका सेनाबीच हुने पारस्पारिक भ्रमणले द्विपक्षीय सुरक्षा चासोलाई सम्बोधन गर्न सहज हुनेमा जोड दिएका थिए  ।

सैन्य टोली पोखरास्थित मध्य–कमाण्ड हेडक्वाटर, शिवपुरीस्थित कमाण्ड तथा स्टाफ कलेजको अध्ययन भ्रमण गर्नेछ भने  धार्मिक एवं पर्यटकीय क्षेत्रमा समेत जाने छ ।  नेपाली सेनाका अनुसार टोलीले पशुपतिनाथ मन्दिर, मुक्तिनाथ मन्दिर, नाम्चे स्थित होटल एभरेष्ट भ्यु र चन्द्रागिरीको भ्रमण गर्ने छ ।

अष्ट्रेलिया, भुटान, माल्दिभ्स र श्रीलंकाका सैनिक अधिकारीहरु सम्मिलित उक्त टोली कार्तिक ६ गते भारत फर्किने कार्यक्रम तय छ ।