काठमाडौं । सल्यानमा मासुको विषयलाई लिएर विवाद हुँदा बाबुले छोराको हत्या गरेका छन् । बन्गाड कुपिण्डे नगरपालिका–१० माझकाँडाका वर्ष ५५ का नीमबहादुर कवरले खुर्पा प्रयोग गरी वर्ष ३३ का छोरा रुपलाल कवरको हत्या गरेका हुन् ।

जिल्ला प्रहरी कार्यालय सल्यानका अनुसार मंगलबार दिउँसो बाबुछोराबीच मासुको विषयमा सामान्य विवाद भएको र राति करिब १० बजे नीमबहादुरले घरमै छोराको हत्या गरेका हुन् ।

बाबुको खुर्पा प्रहारबाट रुपलालको घटनास्थलमै मृत्यु भएको हो । मंगलबार दिउँसो राँगा काटेका बेला बाबु नीमबहादुरले आफूलाई कम मासु दिएको भन्दै रुपलालसँग झगडा गरेका थिए । राती रुपलाल मदिरा सेवन गरी बाबुको घरमा गएका बेला धारिलो हतियार प्रयोग गरी हत्या भएको प्रहरीले जनायो ।

प्रहरीका अनुसार नीमबहादुरले गल्ती स्वीकारी सकेका छन् । उनलाई प्रहरीले नियन्त्रणमा लिएको छ ।