एजेन्सी । च्याम्पियन्स लिगको समूह चरणको दोस्रो खेलमा पनि स्पेनिस क्लब बार्सिलोना पराजित भएको छ। बुधबार राति भएको खेलमा बार्सिलोना बेन्फिकासँग ३–० गोलले हारेको हो।

बेन्फिकाको जितमा डर्विन न्यूनेजले २ गोल र राफा शिल्भाले एक गोल गरे। खेल शुरु भएको दुई मिनेटमा नै डर्विनले टोलीलाई शुरुवाती अग्रता दिलाएका थिए।

पहिलो हाफमा १–० गोलले अघि रहेको बेन्फिकाले दोस्रो हाफमा २ गोल गरेको थियो। सिल्भाले ६९ मिनेटमा टोलीको अग्रता दोब्बर बनाएका थिए। त्यसको २ मिनेटपछि बेन्फिकाले नै पेनाल्टी पायो। डर्विनले पेनाल्टीमा गोल गर्दै टोलीको जित पक्का गरे।

जितसँगै बेन्फिका तालिकाको दोस्रो स्थानमा छ। उसले २ खेलबाट ४ अंक जोडेको छ। हार बेहोरेको बार्सिलोना अंकविहिन हुँदै तालिकाको पुछारमा छ। बायर्न म्युनिख २ खेलबाट ६ अंकका साथ शीर्षस्थानमा छ।

लियोनल मेसीले छाडेसँगै कमजोर देखिएको बार्सिलोना च्याम्पियन्स लिगको समूह चरणबाटै आउट हुने खतरा भएको छ। यसो त समूह चरणमा ४ खेल खेल्न बाँकी छ। र पनि टोलीको यही प्रदर्शनले बार्सिलोना अगाडि बढ्ने अपेक्षा गर्न सकिँदैन।