वीरगञ्ज । जिल्ला प्रहरी कार्यालय पर्साले दुई वर्षअघि वीरगञ्जमा भएको बम विष्फोटको घटनाका मुख्य अभियुक्तलाई आज पक्राउ गरेर सार्वजनिक गरेको छ ।

पक्राउ पर्नेमा विवेक सिंह उपनामले चिनिने ३३ वर्षीय फुलहसन अन्सारी रहेका छन् । अन्सारी २०७६ साउन २४ र २८ गते वीरगञ्जमा भएको बम विस्फोटको घटनाका मुख्य अभियुक्त रहेको प्रहरीले बताएको छ।

जिल्ला प्रहरी कार्यलय पर्साका प्रहरी प्रमुख एसपी बेलबहादुर पाण्डेका अनुसार अन्सारीलाई सोमबार बिहान ४ बजे वीरगञ्ज महानगरपालिका–२४ रामगढवास्थित आफ्नो घर आउँदै गरेको अवस्थामा पक्राउ गरिएको हो ।

पक्राउ परेका अन्सारीले व्यापारीलाई धम्की दिने र फिरौती लिने जस्ता काम समेत गर्ने गरेको अनुसन्धानमा खुलेको एसपी पाण्डेले बताए । एसपी पाण्डेका अनुसार अन्सारीविरुद्ध विष्फोटक पदार्थ, हातहतियार तथा खरखजाना र संगठित अपराधसम्बन्धी मुद्दा पर्सा जिल्ला अदालतमा विचाराधीन रहेको छ ।

त्यसअघि अन्सारी ०६५ पुस ७ गते वीरगञ्जका व्यापारी राजेश क्यालको गोली हानी हत्या भएको घटनामा संलग्न थिए । उनलाई प्रहरीले ०६५ पुष १६ गते घटनामा प्रयोग भएको हतियारसहित पक्राउ गरेको थियो । उनलाई अदालतले जन्मकैदको फैसला सुनाएको थियो ।

कैद भुक्तान गरिरहेको समयमा २०७४ सालको दशैँमा ५६ प्रतिशत कैद मिनाहा भई कारागार कार्यालय पर्साबाट थुनामुक्त भएका उनी पुनः आपराधिक क्रियाकलापमा संलग्न रहेको प्रहरीको रेकर्डमा देखिएको एसपी पाण्डे बताउछन्।