काठमाडौं । नेत्रविक्रम चन्द ‘विप्लव’ नेतृत्वको नेकपाले अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) को विरोधमा काठमाडौंमा विरोधसभा गरेको छ । एमसीसी राष्ट्रघाती भएको भन्दै नेकपाले आयोजना गरेको विरोध सभामा आईटी आर्मीले पनि साथ दिएको नेकपाका एक नेताले बताए । उनीहरुले एमसीसी सम्झौता खारेज गर्न टुँडिखेलमा जनसभा गरेको हो ।

सोमबार भएको प्रदर्शनमा महासचिव नेत्रविक्रम चन्द ‘विप्लव’, नेताहरु खड्गबहादुर विश्वकर्मा, हेमन्तप्रकाश वलीलगायतका नेताहरु पनि सहभागी भएका छन् ।

उनीहरुले ‘एमसीसी सम्झौता स्वीकार्नु देश अस्थिरता र द्वन्द्वमा फस्नेछ’, ‘एमसीसी सम्झौता पास गर्नु नवऔपनिवेशिकरण स्वीकार्नु हो’, ‘एमसीसीसँगको सम्झौता खारेज गरौं, राष्ट्रिय स्वाधिनताको रक्षा गरौं’ लगायतका नारा लगाएका थिए ।