एजेन्सी । विश्व फुटबलका स्टार खेलाडी क्रिस्टियानो रोनाल्डोले म्यानचेस्टर युनाइटेड फर्किएर आफूले जीवनकै उत्कृष्ट निर्णय गरेको बताएका छन्। शनिबार राति भएको इंग्लिस प्रिमियर लिगको खेलमा २ गोल गर्दै उनले युनाइटेडलाई न्यूक्यासलविरुद्ध ४–१ को जित दिलाउन मद्धत गरेका थिए।

खेलपछि रोनाल्डोले १२ वर्षपछि क्लब फर्किनु आफ्नो जीवनको सबैभन्दा राम्रो र सही निर्णय भएको बताएका हुन्। ‘यो नै मैले मेरो जीवनमा गरेको सबैभन्दा राम्रो निर्णय हो,’ टेलिफुटसँगको कुराकानीमा उनले भने।

‘म इतिहास रच्न चाहन्छु, म्यानचेस्टर युनाइटेडलाई राम्रो नतिजा दिलाउन र उपाधि जित्न मद्धत गर्नेछु,’ रोनाल्डोले थपे। त्यस्तै राफेल भारानेले रोनाल्डोसँग पुनर्मिलन भएको भन्दै खुशी व्यक्त गरे।

‘सर्वोत्कृष्टसँग खेल्नु खुशीको कुरा हो। क्रिस्टियानो उत्कृष्ट खेलाडी हुन्, शारिरीकरुपमा सधैं र फिनिसिङमा उनको एक क्वालिटी छ,’ भारानेले भने, ‘उनले टिममा सबैभन्दा महत्त्वपूर्ण कुरा उनको जित्नैपर्ने मानसिकता लिएर आएका छन्।’