संखुवासभा । संखुवासभा सामूहिक हत्याकाण्डका आरोपीत लोकबहादुर कार्कीलाई प्रहरीले आज सार्वजनिक गरेको छ । २६ वर्षीय कार्कीलाई प्रहरीले शनिबार पक्राउ गरेको थियो ।

प्रहरीका अनुसार गत सोमबार बिहान लोकबहादुरले मादी गाउँपालिका–१ खोलागाउँका तेजबहादुर कार्कीसहित उनको परिवारका ६ जनाको विभत्स हत्या गरेका हुन्।

लोकबहादुरले हत्या गरेको स्वीकार गरिसकेको प्रहरीले बताएको छ।

प्रहरीका अनुसार लोकबहादुरले सुरुमा तेजबहादुरको हत्या गरेका थिए । सोमबार विहान खेताला खोज्न निस्किएका तेजबहादुरलाई बाटोमा कुरेर बसेका लोकबहादुरले अचानक आक्रमण गरेर हत्या गरेका थिए । तेजबहादुरलाई हत्या गरेको पत्नी कमला र बुहारी रञ्जनाले घरबाट देखेपछि दौडिँदै गएका थिए । घरनजिकै रहेको खोला छेउमा दुवैलाई हत्या गरे ।

आमा र हजुरआमालाई हत्या गरेको ८ वर्षका विपिन कार्की र पाँच वर्षीया गोमा कार्कीले देखेपछि प्रमाण मेटाउन लोकबहादुरले उनीहरुलाई पनि लखेटेर बारीमा हत्या गरेका थिए । त्यसपछि घरमा पसेर लोकबहादुरले कुँडो पकाइरहेकी ८४ वर्षीया पार्वतीको हत्या गरेको अनुसन्धानमा खुलेको प्रहरीको दावी छ ।

घटनास्थलमा संघीय प्रहरी इकाई कार्यालय धरानका एसपी भीम दाहाल, केन्द्रीय अनुसन्धान ब्यूरोबाट खटिएका डिएसपी रुगम कुँवर र संखुवासभाका डिएसपी लालध्वज सुवेदी सहितका अनुसन्धान अधिकृतहरूले हत्याको अनुसन्धान गरेका थिए ।

अर्को पनि पढ्नैपर्ने

संखुवासभा सामूहिक हत्याकाण्ड : भतिजाले अपराध स्वीकारेको प्रहरीको दावी