रौतहट – रौतहटमा दिनदहाडै एक पुरुषको हत्या भएको छ। चन्द्रपुर नगरपालिका ३ गैंडाटार गाछीटोलका ५० वर्षीय रोहिणीप्रसाद घोरासैनीको शनिबार दिउँसो हत्या भएको हो।

प्रहरीका अनुसार घाँस काट्न गएका उनी कालापानी सामुदायिक वनको झाडीमा हत्या गरिएको अवस्थामा फेला परेका हुन्। मृतकका भाई बोधनाथ घोरासैनीका अनुसार उनका दाजु बिहान ८ बजे घाँस काट्न भनेर जंगल गएका थिए।

घटनास्थलमा इलाका प्रहरी कार्यालय चन्द्रनिगाहपुरका डिएसपी लिलाराज लामिछाने सहितको टोली पुगेर थप अनुसन्धान थालेको छ। त्यसका लागि प्रदेश–२ प्रहरी कार्यालयबाट तालिम प्राप्त कुकुर बोलाइएको प्रहरीले जानकारी दिएको छ।

यसैबीच प्रहरीले घटनामा संलग्न रहेको आशंकामा स्थानीय प्रह्लाद कार्कीलाई नियन्त्रणमा लिएको छ। कार्कीलाई नियन्त्रणमा लिएर अनुसन्धान सुरु गरिएको डिएसपी लामिछानेले जानकारी दिएका छन्। प्रहरीले घटनाबारे विस्तृत अनुसन्धान भइरहेको बताएको छ।