एजेन्सी – निर्देशक सुदर्शन थापाले सोमबार मोडल तथा समाचार वाचिका सुप्रिया कटवालसँगको इन्गेजमेन्ट गरेका छन्। ६ महिनादेखि प्रेम सम्बन्धमा रहेका उनीहरुले इन्गेजमेन्ट गरेका हुन्।

तर उक्त समारोहमा नायिका पूजा शर्मा गइनन्। कुनै समय पूजा र सुदर्शन प्रेम सम्बन्धमा रहेको हल्ला चलेको थियो। नायक आकाश श्रेष्ठसँग पूजा नजिक भएपछि उनीहरुबीच मनमुटाव भएको बताइन्छ।

काठमाडौंको –याडिसन होटलमा आयोजना भएको इन्गेजमेन्ट समारोहमा अभिनेता राज कटुवाल, वर्षा सिवाकोटीको समेत उपस्थिति रहँदा सुदर्शनको सबैभन्दा नजिकको साथी भनिएकी पूजाको उपस्थिति नहुनुलाई फिल्म क्षेत्रमा विभिन्न टीकाटिप्पणी भइरहेका छन्।

कतिपयले त सुदर्शनको इन्गेजमेन्ट हेर्न नसक्ने भएर पूजा समारोहमा उपस्थित नभएको आरोप पनि लगाए। थुप्रै प्रोजेक्टमा उनीहरूले सहकार्य पनि गरेका थिए। सुदर्शनले निर्देशक गरेको प्रायः फिल्ममा पूजा नै नायिकाको भूमिकामा थिइन्। दुवैले मिलेर फिल्मसमेत निर्माण गरिसकेका छन्।

धेरै प्रोजेक्टमा सहकार्य गरेका दुवैको प्रेम सम्बन्धको हल्लासमेत नचलेको होइन । तर दुवैले मिल्ने साथी बताउँदै आएका छन्। केही पहिले त दुवैले एउटै गाडी पालोपालो चढ्ने गरेका थिए।

यति नजिकका साथी सुदर्शनको इन्गेजमेन्टमा नगएर कहाँ गएकी थिइन् त पूजा ? धेरैको मनको प्रश्न हो यो। पूजाले भने एक मिडियासँग कुरा गर्दै सङ्गीतकार अर्जुन पोखरेलको एक गीतको सुटिङमा व्यस्त भएको बताएकी छिन्। तर पूजा त्यहाँ जान नचाहेको भने प्रष्ट भएको छ।