बुटवल । रुपन्देहीको तिलोत्तमा -८ मणिग्रामकी सिता भण्डारीको मृत्यु शंकास्पद रहेको भन्दै माईती पक्षले छानविन गरी दोषी माथि कारबाहीको माग गरेका छन् ।

मंगलबार बुटवलमा पत्रकार सम्मेलन गर्दै गत भदौं १९ गते मृतक भेटिएकी भण्डारीको माइती पक्षले घर परिवारको योजनामा आफ्नो छोरीको हत्या भएको भन्दै गरी दोषी माथि कारबाहीको माग गरेका हुन् ।

पत्रकार सम्मेलनमा मृतकका बुबा हरिप्रसाद भण्डारीले शवको प्रकृति र घटनाक्रम हेर्दा आत्महत्या हुन नसक्ने दावी गरेका छन् । यस्तै, मृतककी श्रीमान् टिका पौडेलले हत्या गरी झुन्ड्याएको वहाना गरेको माइती पक्षको आरोप छ । अनुहारमा रगत लतपतिएको दृश्यले हत्या नै भएको उनीहरुको भनाइ छ ।

घटनाबारे इलाका प्रहरी कार्यालय बुटवलमा किटानी जाहेरी दिए पनि प्रहरीले जाहेरी दर्ता नगरेको बुवा भण्डारीले बताए । तर, इलाका प्रहरी कार्यालय बुटवलका प्रमुख नायब उपरीक्षक (डीएसपी)मदन कुँवरले पोष्टमार्टम रिपोर्टमा आत्महत्या गरेको देखिएकाले किटानी जोहरी लिन नसकिने बताए ।

श्रीमानको व्यवहारका कारण सीता भण्डारीले आत्महत्या गर्न बाध्य भएको अनुसन्धानबाट खुलेकाले उनलाई पक्राउ गरी अनुसन्धान सुरु गरिएको डीएसपी कुँवर बताउछन्।

मृतकका श्रीमान पौडेल तानसेनमा दरबार रिसोर्ट सञ्चालन गर्दै आएका छन् ।