एजेन्सी – अमेरिकी राष्ट्रपति जो बाइडेनले अफगानिस्तानको अवस्थाबारे फेरी मुख खोलेका छन्। उनले अफगानिस्तानबाट अमेरिकीहरुको फिर्ता जीवनको खतराबिना सम्भव नभएको बताएका छन्।

ह्वाइट हाउसमा बोल्दै बाइडेनले अमेरिकाले अफगानिस्तानबाट अहिलेसम्म १३ हजार मानिसहरुलाई निकालेको बताएका छन्। उनले यो इतिहासको सबैभन्दा ठूलो र सबैभन्दा कठिन एयरलिफ्ट भएको पनि उल्लेख गरे।

राष्ट्रपति बाइडेनले सबै अमेरिकी नागरिकहरु र अमेरिकी सेनालाई सहयोग गरेका ५०–६० हजार अफगानि नागकिरलाई पनि उद्धार गरेर अमेरिका ल्याउने जानकारी दिएका छन्। तालिबानले तीव्रगतिमा अफगानिस्तान कब्जा गरेपछि अमेरिकाको लगातार आलोचना भइरहेको छ। ‘जो कोही अमेरिकी घर आउन चाहन्छन्, हामी उनीहरुलाई घर ल्याउनेछौं,’ उनले भने।

अमेरिकी सेना देश छाड्ने आशाका साथ अफगानिस्तानका सहयोगीहरुलाई यही वाचा गर्ने उनले स्पष्ट पारे। जे होस्, उनले अमेरिकी नागरिकहरुको उद्धार मुख्य प्राथमिकता हुने उल्लेख गरे।

‘यो मिशन खतरनाक छ’

‘कुनै गल्ती गर्नु हुँदैन। अफगानिस्तान छाड्ने यो मिशन खतरनाक छ। त्यहाँ हाम्रो सुरक्षा बलहरुका लागी एक खतरा छ र यो कठिन परिस्थितिमा गरिँदै छ,’ बाइडेनले भने।

‘अन्तिम नतिजा कुनै हानि वा समस्याबिना आउनेछ भनेर म प्रतिज्ञा गर्न सक्दिन तर कमाण्डर–इन–चीफको रूपमा म तपाईलाई आश्वासन दिन सक्छु कि सबै आवश्यक संसाधनहरु परिचालन गर्नेछु,’ उनले थपे।

काबुलमा फसेका अमेरिकीहरुलाई उद्धार गर्न अमेरिकी सेना पठाउनु पर्ने आवश्यकता नभएको उनले जिकिर गरे। तालिबानले अमेरिकी पासपोर्ट भएका सबैलाई एयरपोर्टमा प्रवेश गर्न दिइरहेको उनले जानकारी दिएका छन्।

रिपोर्टमा उल्लेख गरिएअनुसार काबुलमा अमेरिकी नागरिकहरु लाई एयरपोर्टसम्म पुग्न समस्या छ। अमेरिकी रक्षामन्त्री लोयड अस्टिनले शुक्रबार अफगानिस्तान छोड्न खोज्ने अमेरिकीहरुलाई तालिबान लडाकुहरुले कुटपिट गरेको बताएका थिए।