काठमाडौं।  नेपालका लागि चिनियाँ राजदूत होउ यान्छीले नेपालले खरिद गरेको सबै खोप पनि चाँडै आउने बताएकी छन् ।

राजदूत  यान्छीले चीनले नेपाललाई थप खोप सहयोग गर्ने आश्वासन दिएकी छन् । सोमवार विहान आयोजित भर्चुअल पत्रकार सम्मेलनलाई सम्बोधन गर्दै राजदूत यान्छीले कोभिड महामारीका कारण नेपालबाट चीनतर्फ रोकिएको निर्यात कोभिड नियन्त्रण भएपछि मात्रै खुल्ने वताइन ।

नेपालले खरिद गरेको ४० लाख डोज साइनोफार्ममध्ये सबै चाँडै नै आउने  दाबी गर्दै उनले भविष्यमा नेपाललाई बढी भन्दा बढी खोप पठाउने जानकारी दिइन ।

चीनले १८ लाख साइनोफार्म कम्पनीको भेरोसेल खोप उपलब्ध गराइसकेको छ भने नेपालले खरिद गरेको ४० लाख डोज खोपमध्ये पहिलो चरणमा ८ लाख खोप आइसकेको छ ।