चितवन। केहि दिन अगाडि अपहरणमा परेकी राप्ती नगरपालिका वडा नं. ३ की सुजिता भण्डारीको शव फेला परेको छ । चितवनको राप्ती नगरपालिका वडा नम्बर ३ सामुदायीक जंगलमा  सडेगलेको अवस्थामा भेटिएको शव भण्डारीकै भएको खुलेको हो ।

चितवन प्रहरी प्रमुख एसपी ओमप्रसाद अधिकारीका अनुसार भेटिएको शवलाई भण्डारीकै परिवारले पहिचान गरेका हुन।

परिवारका सदस्यले सुजिताको नै शव भएको बताएको प्रहरीले जनाएको छ । शव घटनास्थलमै रहेको र पोष्टमाटमका लागि भरतपुर अस्पताल ल्याउने तयारी गरिएको छ ।

उक्त शव जंगलमा च्याउन टिप्न गएका स्थानियहरुले देखेपछि प्रहरीलाई खबर गरेका थिए । असार ११ गते विहान ६ बजे साथिको घर जाने भनेर हिडेकी सुजिता सोही दिनदेखि वेपत्ता भएकी थिइन ।

उनले सोही दिन १२ बजे आफ्नी दिदीलाई फोन गरेर अपहरणमा परेको बताएको परिवारका सदस्यले प्रहरीलाई जानकारी दिएका थिए।

घटनाको अनुसन्धानका लागि सिआईबीको टोली पनि खटिएको छ।

प्रहरीले घटनास्थल शिल गरेको छ भने भोलि तालिम प्राप्त कुकुर र फरेन्सिक डाक्टर ल्याएर थप अनुसन्धान अघि बढाउने जनाएको छ । सुजिताको केही महिनाअघिसम्म एक युवकसँग सम्पर्क भएको देखिएको र प्रहरीको अनुसन्धान पनि त्यतैतिर सोझिएको छ।

सुजिताको अन्यत्रै हत्या गरी शव पानीले बगाएर ल्याएर लामो समयदेखि अड्काएको जस्तो देखिएको आशंका गरिएको छ।