काठमाडौँ। नेपाल कम्युनिष्ट पार्टी (नेकपा) एमालेको दसौं राष्ट्रिय महाधिवेशन आयोजक कमिटीको बैठकमा शिक्षामन्त्री कृष्णगोपाल श्रेष्ठको राजीनामा माग भएको छ ।

बुधबार प्रधानमन्त्री निव्स बालुवाटारमा बसेको बैठकमा मन्त्री श्रेष्ठले जातीय विभेदलाई प्रश्रय दिने काम गरेको भन्दै केन्द्रीय सदस्य जगत विश्वकर्माले उनको राजीनामा माग गरेको एक नेताले जानकारी दिए ।

केहीदिनअघि सञ्चारकर्मी रुपा सुनारलाई दलित भएका कारण कोठा भाडामा नदिएको भन्दै प्रहरीले काठमाडौं बबरमहलकी घरबेटी सरस्वती प्रधानलाई नियन्त्रणमा लिएको थियो ।

३ दिनपछि प्रहरी नियन्त्रणबाट छुटेकी प्रधानलाई मन्त्री श्रेष्ठले आफ्नै सवारी साधनमा राखेर घर पुर्‍याएका थिए । मन्त्री श्रेष्ठको उक्त कार्यको सर्वत्र विरोध भइरहेको छ।

यस्तै, जातीय विभेदलाई प्रश्रय दिएको आरोप लागेका शिक्षामन्त्री  श्रेष्ठले गल्ती महसुस भएको भन्दै आइन्दा यस्तो गल्ती नगर्ने बताएका छन् । हिजो राष्ट्रिय मानव अधिकार आयोग पदाधिकारीहरुसँगको छलफलमा मन्त्री श्रेष्ठले गल्ती गरेको महसुस भएको र आइन्दा यस्तो गल्ती नगर्ने बताएका थिए ।