काठमाडौं । प्रधानमन्त्री केपी शर्मा ओलीले जातीय विभेद गरेको आरोपमा प्रहरी हिरासतमा रहेकी सरस्वती प्रधानलाई छुटाउन पुगेको विषयमा शिक्षामन्त्री कृष्णगोपाल श्रेष्ठको ध्यानाकर्षण गराएका छन् ।

मंगलबार प्रधानमन्त्री ओलीले मन्त्री श्रेष्ठलाई आवेशमा आएर यस्तो काम नगर्न सचेत गराएको कानूनमन्त्री लीलानाथ श्रेष्ठले जानकारी दिए । मन्त्री श्रेष्ठले भने, ‘सम्माननीय प्रधानमन्त्रीज्यूले मन्त्रीज्यूलाई ध्यानाकर्षण गर्नुभएको छ । आवेशमा आएर यस्तो काम नगर्नुहोस् मन्त्रीज्यू । जुन काम तपाईंले गर्नुभयो, त्यो ठीक भएन भन्नुभएको छ ।’

मन्त्रालयमा आयोजित पत्रकार सम्मेलनमा उनले प्रधानमन्त्री ओलीको भनाइलाई उधृत गर्दै थपे, ‘मन्त्री श्रेष्ठको कामलाई ‘दुर्भाग्यपूर्ण’ समेत रहेको र स्वयम् प्रधानमन्त्रिको समेत ध्यानाकर्षण रहेको छ।’

केही दिनअघि सञ्चारकर्मी रुपा सुनारलाई दलित भएका कारण कोठा भाडामा नदिएको भन्दै प्रहरीले काठमाडौं बबरमहलकी घरबेटी प्रधानलाई नियन्त्रणमा लिएको थियो । ३ दिनपछि प्रहरी नियन्त्रणबाट छुटेकी उनलाई मन्त्री श्रेष्ठले आफ्नै सवारी गाडीमा लिफ्ट दिएका थिए । उनको यो शैलीको सर्वत्र बिरोध हुदै आइरहेको छ।