काठमाडौं । बुधबार नेपाली काँग्रेस सभापति शेरबहादुर देउवाको निवास बुढानिलकण्ठमा बसेको विपक्षी गठबन्धनकाे बैठकले प्रधानमन्त्री केपी शर्मा ओली सरकारविरुद्ध सडक आन्दोलन गर्ने निर्णय गरेको छ ।

काँग्रेस सभापति देउवा, माओवादी केन्द्रका अध्यक्ष पुष्पकमल दाहाल प्रचण्ड, एमालेमा समानान्तर गतिविधि गरिरहेका वरिष्ठ नेता माधवकुमार नेपाल र जसपाका अध्यक्ष उपेन्द्र यादवबीच भएको छलफलले सरकारविरुद्ध सडक आन्दोलन गर्ने निर्णय गरेको बैठकमा सभागी एक नेताले जानकारी दिए ।

उनका अनुसार भौतिक दूरी कायम गरेर भए पनि सडकमा प्रदर्शन गर्ने निर्णय भएको छ । बैठकले प्रदर्शनका लागि पहिलो चरणमा दल सम्बद्ध भातृ संगठनहरुलाई सडकमा उतार्ने निर्णय गरेको छ ।

दलहरुको यो निर्णयसँगै पाँच विद्यार्थी संगठनहरुले विहीबार प्रदर्शन गर्ने विज्ञप्ति गरेर जानकारी दिएका छन् । गठबन्धनको बैठकमा वर्तमान राजनीतिक अवस्थाबारे समीक्षा भएको र सरकार विरुद्ध सडकमै आन्दोलन गर्नुपर्ने निष्कर्ष निकालेको एक नेताले जानकारी दिए ।