काठमाडौँ । आफूलाई सामाजिक अभियन्ता हुँ भन्दै हिड्ने ज्वाला संग्रौलालाई तीन दिन प्रहरी हिरासतमा राखेर अनुसन्धान गर्न प्रशासनले अनुमति दिएको छ ।

पक्राउ परेकी संग्रौलालाई धम्क्याउने, कुटपिट र अभद्र व्यवहारसम्बन्धी कसूरमा अनुसन्धानका लागि हिरासतमा राख्न जिल्ला प्रशासन कार्यालय, काठमाडौंले अनुमति दिएको हो ।

काठमाडौंका प्रमुख जिल्ला अधिकारी कालिप्रसाद पराजुलीले काठमाडौं प्रहरीको माग अनुसार अनुसन्धानका लागि अनुमति दिइएको बताए । संग्रौलासँगै उनका पति हिमाल उपाध्याय र शर्मिला वाइवालाई पनि थुनामा राख्न अनुमति दिइएको छ ।

आइतबार महानगरीय प्रहरी परिसर टेकुले युवा संघकी केन्द्रीय सदस्य खुस्बु घिमिरेले दिएको जाहेरीका आधारमा संग्रौलासहित ३ जनालाई पक्राउ गरेर अनुसन्धान थालेको थियो।

खुस्बुमाथि गत जेठ १६ गते गौशला प्रहरी वृत्तको हिरासतमा ज्वालाको समूहले आक्रमण गरेको थियो । त्यसविरुद्ध खुस्बुले टेकु प्रहरी परीसरमा उजुरी गरेकी थिइन् ।