काठमाडौँ । निषेधाज्ञाको समयमा सरकारी गाडीमा युवतीलाई लिएर स्वयम्भूको डाँडोमा ‘डेटिङ’ पुगेका शहरी विकास विभाग अन्तर्गतको नयाँ शहर आयोजना प्रमुख रोशन श्रेष्ठले आफूहरु पूजा गर्नका लागि त्यहाँ पुगेको बयान दिएका छन्।

गत जेठ १८ गते मंगलबार स्वयम्भु डाँडामा प्रदेश नं. ३–०१– ००२ झ ४९२२ नम्बरको सरकारी गाडी लिएर एक जोडी अंकमाल गरेको तस्बिर र भिडियो सामाजिक सन्जालमा सार्वजनिक भएपछि गृह मन्त्रालयले आवश्यक छानविनका लागि निर्देशन दिएको थियो  ।

मन्त्रालयले कार्यालयकै युवती लिएर स्वयम्भू पुग्ने निर्देशक श्रेष्ठलाई थप अनुसन्धानका लागि जिल्ला प्रशासन कार्यालय काठमाडौंमा पत्र काटेको थियो ।

गृहको पत्र अनुसार सीडीओ कार्यालय काठमाडौँले घटनाको छानविनका लागि सहायक प्रमुख जिल्ला अधिकारी जनक भट्टको नेतृत्वमा छानविन समिति गठन गरेको थियो ।

समितिले बयानका लागि श्रेष्ठ र ती करारका कर्मचारीलाई बोलाएर सोधपुछ गरेको थियो ।

समितिका एक सदस्यका अनुसार उनीहरु दुबैले समितिलाई दिएको बयान क्रममा आफूहरु स्वयम्भूमा पूजा गर्न गएको बताएका छन् ।

स्वास्थ्य संस्थाको इस्टिमेट तयार पार्न गएको र काम सकिएपछि स्वयम्भू दर्शन गर्न तथा मन्दिरमा पूजा सामग्री चढाउन गएको बयान दिएको ती सदस्यले बताए ।

यस अघि मिडियाले यस विषयमा उनै श्रेष्ठलाई प्रश्न गर्दा उक्त गाडी आफैले चढ्ने भए पनि ड्राइभरले लगेको हुनसक्ने प्रतिक्रिया दिएका थिए । उनले भिडियो र तस्वीरमा देखिएको व्यक्ति आफू नभएको दाबी गरेका थिए ।

यद्यपि छानविन समितिले जाँचबुझ गर्दा उनीहरुले पास लिएरै हिँडेको देखिएको हुँदा निषेधाज्ञा उल्लघन नभएको निष्कर्ष निकालेको छ ।

श्रेष्ठले चलाएको सो प्रदेश ३–०१–००२ झ ४९२२ नम्बरको सरकारी गाडीको पास शहरी योजनाका विभागीय प्रमुखले दिएको पाइएका कारण निषेधाज्ञा भने उल्लंघन नभएको निष्कर्षमा समिति पुगेको हो ।

गृहले निषेधाज्ञा उल्लंघन भए वा नभएको जाँचबुझ गर्न जिल्ला प्रशासन कार्यालयलाई पत्र काटेको थियो र उल्लंघन भएको भए सोही अनुसार कारवाही गर्न पनि भनेको थियो ।

समितिले निषेधाज्ञा उल्लंघन भने नभएको निष्कर्षसहित छानविनको प्रतिवेदन र आवश्यक कारबाहीको मागसहित भौतिक योजना मन्त्रालयलाई पठाइएको छ ।