काठमाडौं । असार दोस्रो सातादेखि स्मार्ट लकडाउन हुने भएको छ ।

कोभिड–१९ निर्देशक समितिको बुधबार बसेको बैठकले संक्रमणको जोखिम राख्न र अत्यावश्यक बस्तुहरुको उत्पादन तथा आपूर्ति सुचारु गर्न स्मार्ट लकडाउन गर्ने निष्कर्ष निकालेको हो ।

जारी निषेधाज्ञा कायमै राखेर त्यसपछिको अवस्था मूल्यांकन गरी केही क्षेत्र खुला गर्ने समितिले निर्णय गरेको छ । बालुवाटारमा बसेको बैठकले कतार, साउदी अरेबिया, मलेसिया, जापान लगायतका मुलुकमा पुनः हवाई उडान सुचारु गर्ने निर्णय गरेको छ ।

यी देशहरुबाट सातामा दुई हजार यात्रु नबढ्ने गरी हवाई उडान सुचारु गरिने छ । बैठकमा प्रधानमन्त्री एवं निर्देशक समितिका प्रमुख केपी शर्मा ओलीले लकडाउन खुकुलो बनाउनुपर्ने सल्लाह दिएका थिए ।