काठमाडौँ । लगातारको वर्षाका कारण देशका विभिन्न नदी र खोलामा बाढी आएको छ । बाढीसँगै पहिरोको खतरा पनि बढेको छ । देशका अधिकांश नदीहरुमा पानीको बहाव बढेको छ । नारायणी नदीमा पानीको बहाव बढेको छ । कास्कीको लुम्ले र चितवनको चर्खरेमा बाढी आएको जल तथा मौसम विज्ञान विभागको बाढी पूर्वानुमान महाशाखाले जनाएको छ । गण्डकी नदीमा पानीको बहाव बढ्दा नदी किनारका बस्ती जोखिमा परेका छन् ।

कालीगण्डकी, तिनाउ, पश्चिम राप्ती, बबई, भेरी र यसका सहायक नदीमा पनि पानीको बहाव बढेको छ । कर्णाली र सुदूरपश्चिम प्रदेशमा पनि वर्षाका कारण बाढी र पहिरोको जोखिम बढेको महाशाखाले जनाएको छ । बिहीवारसम्म ति सबै नदीहरुमा पानीको वहाव अत्यधिक बढ्ने अनुमान गरिएको छ ।

गत जेठ २८ गते मनसुन भित्रिएसँगै देशभर लगातार पानी परिरहेको छ । यो हप्ता मनसुन सक्रिय भइ देशभर पानी पर्ने हुँदा बाढी र पहिरोको जोखिम रहेकाले सचेत रहन विभागले आग्रह गरेको छ । आज देशका धेरै ठाउँमा पानी पर्ने सम्भावना छ । प्रदेश २, वाग्मती, गण्डकी, लुम्बिनी तथा कर्णाली प्रदेशका केही ठाउँमा अत्यधिक पानी पर्ने सम्भावना छ ।