एजेन्सी । कोपा अमेरिका फुटबलमा आयोजक ब्राजिलले नेइमारको गोलको मद्दतमा जित हासिल गरेको छ ।

आज बिहान भएको खेलमा समूह बी मा रहेको ब्राजिलले भेनेजुएलालाई ३–० गोलले पराजित गरेको हो ।

एक दिन अघि टिमका १२ खेलाडी तथा प्रशिक्षण अधिकारीहरुमा कोरोना भाइरसको संक्रमण देखिएपछि समस्यामा रहेको भेनेजुएला कमजोर देखियो ।

घरेलु टोली ब्राजिलका लागि खेलको २३ औँ मिनेटमा मार्क्वीन्होसले गोल गरे । खेलको ६४ औँ मिनेटमा पाएको पेनाल्टीमा नेइमारले गोल गर्दै टिमको अग्रता दोब्बर पारे । खेलको ८९ औँ मिनेटमा नेइमारको सहयोगमा गाब्रिएल बार्बोसा अल्मेइदाले गोल गरेपछि ब्राजिल ३–० ले विजयी भयो ।

साबिक विजेता ब्राजिलले उपाधि रक्षाको यात्रा सहज जितका साथ गरेको हो । ब्राजिलले नौ पटक कोपा अमेरिकाको उपाधि जितेको छ । पछिल्लो पटक ब्राजिलले १२ वर्षपछि सन् २०१९ मा उपाधि जितेको थियो ।

समूह बी मा ब्राजिलसँगै कोलम्बिया, इक्वेडर र पेरु छन् ।