रौतहट। ईलाका प्रहरी कार्यालय चपुरले आफ्नै श्रीमतीलाई एसिड प्रहार गरेको अभियोगमा श्रीमानलाई पक्राउ गरेको छ ।

पक्राउ पर्नेमा चन्द्रपुर नगरपालिका-४ चपुर चोक बस्ने ४२ वर्षीय पुरुष रहेका छन् ।

प्रहरीका अनुसार शनिबार साँझ ती पुरुषले आफ्नै ३८ वर्षीया श्रीमतीलाई एसिड प्रहार गरेका हुन् । घरायसी झै-झगडा हुँदा आफ्नै श्रीमतीलाई एसिड प्रहार गरेर घाइते बनाएको भन्ने खबर प्राप्त हुनासाथ खटिएको प्रहरीले ती पुरुषलाई पक्राउ गरेको प्रहरीको भनाइ छ ।

एसिड प्रहारबाट घाइते भएकी महिलाको चपुरस्थित एपोलो सिटी अस्पतालमा उपचार भइरहेको र अवस्था मध्यम रहेको छ ।

यस सम्बन्धमा थप अनुसन्धान भइरहेको ईलाका प्रहरी कार्यालय चपुरले जनाएको छ ।