हेटौँडा। बाग्मती प्रदेश सरकारले आगामी आर्थिक वर्ष २०७८/०७९ का लागि नीति तथा कार्यक्रम प्रस्तुत गरेको छ ।

आज दिउँसो प्रदेश सभामा प्रदेश प्रमुख विष्णुप्रसाद प्रसाईंले आगामी आवको नीति तथा कार्यक्रम प्रस्तुत गरेका हुन् ।

प्रदेश सरकारले कोभिड–१९ रोकथाम नियन्त्रणलाई प्राथमिकता दिँदै शिक्षा स्वास्थ्य र कृषिका लागि अधिकांश पुरानै योजनालाई निरन्तरता दिएको छ।

‘उत्पादन तथा रोजगारी सिर्जनाका लागि सहुलियतपूर्ण ऋण लगानी कार्यक्रम’, ‘जहाँ प्रविधि, पुँजी र सीप, त्यहाँ युवाको हित’लगायत दर्जनभन्दा बढी नारालाई निरन्तरता दिने उल्लेख गरिएको छ ।

यस्तै, प्रदेश सरकारले आगामी आवमा ‘समाजवादउन्मुख विशेष कार्यक्रम’, ‘मेरो गाउँः उद्यमसहित जिउँने ठाउँ’लगायत नयाँ योजनालाई प्राथमिकताका साथ अघि बढाइने गरी नीति तथा कार्यक्रममा समेटेको छ ।