काठमाडौँ । नेपाल कम्युनिष्ट पार्टी (नेकपा) एमाले एकताका लागि छलफलमा रहेका नेता गोकर्ण विष्टले आफ्नोबारे केही सञ्चार माध्यमहरुमा भ्रमपूर्ण समाचार प्रकाशित भइरहेको भन्दै आपत्ति जनाएका छन् ।

नेता विष्टले आज सामाजिक सञ्जालमार्फत् एक वक्तव्य जारी गर्दै पार्टी र जनसंगठनहरुका सबै तहका कमिटीहरुलाई २०७५ जेठ २ को पुर्ववत् अवस्थामा फर्काउनु पर्ने आफ्नो अडानमा यथावत रहेको समेत प्रष्ट पारेका छन् ।

विष्टले फेसबुकमा लेखेका छन्, ‘नेकपा एमालेको एकता जोगाउन भइरहेको प्रयासलाई कमजोर पार्ने दुराशयले मेरो नाम समेत जोडेर केही सञ्चार माध्यमहरूमा भ्रमपूर्ण समाचार प्रकाशित गरिएका छन् । एकताका लागि गरिएका इमान्दारपूर्ण प्रयासहरूलाई कमजोर पार्न कसले, किन र कसका लागि यस्ता झुठा प्रचार गराउँदै छन् ? समयले नै बताउला ।’

यस्तै, नेता विष्टले पार्टी एकताका लागि अन्तिमसम्म प्रयास जारी राख्ने बताएका छन् । एकताका लागि गरिएका इमानदार प्रयासलाई कमजोर पार्ने प्रयास भइरहेको उनको भनाइ छ ।