काठमाडौं । सगरमाथामा आधार शिबिरमा आज बिहानैदेखि भारी हिमपात भइरहेको छ । अत्यधिक हिमपातका कारण सगरमाथा आरोही संकटमा परेका छन् ।

बुधबारदेखि सुरु भएको हिमपातका कारण आरोहण प्रभावित बनेको थियो । कोही आरोहण गरेर आधार शिबिरमा फर्किएका छन् भने कतिपय आरोही दोश्रो शिविरमै रोकिएका छन् ।

आरोहण गरिसकेका आरोहण कम्पनीका कामदारहरले दोस्रो शिविरदेखि सामान लिएर फर्किन नसकेको सम्पर्क अधिकृत खिमलाल गौतमले जानकारी दिए । केही आरोहीहरु फर्किने क्रममा घाइते भएको उनले बताए ।

उद्धारका लागि हेलिकप्टर मगाए पनि खराब मौसमका कारण लुक्लादेखि हेलिकप्टर त्यहाँ पुग्न सकिरहेको छैन । हिमपात नरोकिए ठूलो दुर्घटना निम्तिने खतरा बढेर गएको छ ।

मौसमविदहरुले तीन दिनसम्म लगातार वर्षा र हिमपात हुने बताएका छन् । गृह मन्त्रालयले हिमाल आरोहण तत्काल रोक्न निर्देशन दिएको छ ।