काठमाडौं । प्रधानमन्त्री केपी शर्मा ओलीको संसदमा विश्वासको मत फेल खाएको छ।

आज विश्वासको मत लिने प्रस्ताव संसदबाट बहुमतले अस्वीकृत भएपछि प्रधानमन्त्री ओली स्वतः पदमुक्त भएका हुन् ।

प्रस्तावको पक्षमा ९३ मत परेको छ भने विपक्षमा १२४ मतप्राप्त भएको छ। त्यस्तै, १५ जना तटस्थ बसेका थिए।

प्रधानमन्त्री ओलीलाई पदमा  रहीरहन १३६ मत आवश्यक थियो।

प्रतिनिधिसभाको सोमबारको बैठकमा २३२ जना सांसद उपस्थित रहेका थिए । सभामुख अग्नि सापकोटाले प्रधानमन्त्रीले विश्वासको मत प्राप्त गर्न नसकेको घोषणा गरे ।

प्रधानमन्त्रीले संविधानको धारा १०० बमोजिम विश्वासको मत लिन चाहेका थिए।

नेपाली कांग्रेस, नेकपा माओवादी केन्द्र, जनता समाजवादी पार्टीको बाबुराम भट्टराई–उपेन्द्र यादव पक्ष, राष्ट्रिय जनमोर्चाले विपक्षमा मत दिएका छन् । भने एमालेकै ओली पक्षले पक्षमा मत दिएका हुन्।

यस्तै, जसपको महन्थ ठाकुर तटस्थ बस्दा एमालेकै माधव नेपाल पक्ष सहभागी भएको थिएन।