काठमाडौं । नयाँ सरकार गठन अर्थात् सत्ता समिकरणमा निर्णायक रहेको जनता समाजवादी पार्टी (जसपा)का नेताहरूको दौडधुप बढेको छ।

प्रधानमन्त्री केपी शर्मा ओलीले संसदमा भोलि विश्वासको मत लिने भएपछि त्यसको अघिल्लो दिन (आज) जसपा अध्यक्ष महन्थ ठाकुर र नेता राजेन्द्र महतोको दौडधुप बढेको हो।

आज बिहानमा नेपाली कांग्रेसका सभापति शेरबहादुर देउवालाई भेटेका जसपाका ठाकुर र महतो यतिबेला प्रधानमन्त्री केपी शर्मा ओलीलाई भेट्न बालुवाटार पुगेको स्रोतले बताएको छ।

स्रोतका अनुसार बूढानिलकण्ठमा झन्डै डेढ घन्टा कुराकानी गरेका ठाकुर र महतो देउवाको निर्णय सुनाउन बालुवाटार पुगेका हुन् । तर, जसपामा दुई धार रहेको छ, जसमा अध्यक्ष उपेन्द्र यादव र डा. बाबुराम भट्टराई ओलीको विपक्षमा छन् भने अर्का अध्यक्ष ठाकुरसहितका केही नेताहरु ओलीको पक्षमा छन् ,

प्रधानमन्त्री ओलीले विश्वासको मत लिने समय नजिकिँदै जाँदा राजनीति थप तरंगित बनेको छ । यही विषयमा सत्तारुढ नेकपा एमाले पनि विभाजनको संघारमा पुगेको छ ।