एजेन्सी । फ्रेन्च लिग वान फुटबलमा पेरिस सेन्ट जर्मेइन (पीएसजी) शीर्ष स्थानमा उक्लिएको छ ।

शनिबार राति भएको खेलमा मेट्जमाथि ३–१ गोल अन्तरले पराजित गर्दै पीएसजी शीर्ष स्थानमा उक्लिको हो । पीएसजीको तालिकामा ३४ खेलबाट ७२ अंक रहेको छ भने एक खेल कम खेलेको लिलिको ७० अंक रहेको छ ।

पीएसजीलाई जिताउनका लागि केलियन एम्बाप्पले दुई गोल गर्दा माउरो इकार्डीले एक गोल गरेका थिए । मेट्जका लागि फावेन सेन्टोजले एक गोल फर्काएका थिए ।

मेट्जको मैदानमा पाहुना टोली पीएसजीका लागि एम्बाप्पले चौथो मिनेटमा गोल गर्दै अग्रता दिलाएका थिए । दोस्रो हाफको शुरुमै मेट्जका फावेनले गोल गर्दै खेल बराबरीमा ल्याएका थिए ।

खेलको ५९ औं मिनेटमा एम्बाप्पेले व्यक्तिगत दोस्रो गोल गरेपछि पीएसजी २–१ गोल अन्तरले अघि बढेको थियो । खेलको ८१ औं मिनेटमा नेयमारलाई रिप्लेस गर्दै मैदान छिरेका इकार्डीले ८९ औं मिनेटमा पेनाल्टी मार्फत गोल गर्दै पीएसजीलाई ३–१ गोलको सहज जित दिलाए ।

यो नतिजापछि पराजित भएको मेट्ज १० औं स्थानमा रहेको छ । फ्रेन्च लिग वान अन्तर्गत शनिबार राति नै ब्रेस्टले सेन्ट इटियनलाई २–१ गोल अन्तरको जित दर्ता गरेको छ ।