काठमाडौं । भारतीय नागरिक चिनियाँ खोप लगाउन नेपाल आउने गरेका छन् । उनीहरु भारतको विभिन्न ठाउँबाट काठमाडौँ आएर चिनियाँ खोप लगाउन थालेको पाइएको छ ।

भारतमा चिनियाँ खोप उपलब्ध छैन । चीनले आफ्नो खोप नलगाएका विदेशी नागरिकलाई चिन प्रवेशको अनुमती दिएको छैन । त्यसैले चीनबाट सामान आयात गर्ने भारतीय व्यापारी खोप लगाउन नेपाल आउन थालेका हुन् ।

मंगलबार २० भारतीय व्यापारीले टेकुस्थित शुक्रराज ट्रपिकल तथा सरुवारोग केन्द्रमा चिनियाँ भेरोसेल खोप लगाएका छन् । बुधबार भने भारतीय नागरिकलाई खोप लगाउन अस्पतालले मानेन ।

‘चीनमा व्यापार गरेको कार्डका आधारमा हामीले उनीहरुलाई खोप लगाइदियौं । पछि उनीहरु भारतबाट खोप लगाउन मात्रै नेपाल आएको पुष्टि भयो’, टेकु अस्पतालका एक चिकित्सकले भने, ‘यसरी टेकु अस्पतालमा मात्रै होइन, काठमाडौंका अन्य र काठमाडौं बाहिरका खोप केन्द्रमा पनि ठूलो संख्यामा भारतीय व्यापारीले खोप लगाएको पाइएको छ।’

विवादपछि अस्पताल प्रशासनले बुधबार खोप सेवा बन्द गरेको थियो ।