एजेन्सी । इंग्लिस क्लब म्यानचेस्टर सिटी च्याम्पियन्सन लिग फुटबलको सेमिफाइनलमा प्रवेश गरेको छ ।

जर्मन क्लब बोरुसिया डर्टमुण्डलाई समग्रमा ४–२ गोलले पराजित गर्दै पेप गार्डिवलाको टिम म्यानचेस्टर सिटीले अन्तिम चारमा स्थान बनाएको हो ।

क्वाटरफाइनलको दोस्रो लेग अन्तर्गत बुधबार राति भएको खेलमा म्यानचेस्टर सिटी २–१ गोलले विजयी भयो । घरेलु मैदानमा भएको पहिलो लेगमा उसले डर्टमुण्डलाई २–१ गोलले नै पराजित गरेको थियो ।

बुधबार राति सम्पन्न खेलमा १५ औँ मिनेटमा बेलिन्घमको गोलबाट डर्टमुण्डले सुरुवाति अग्रता लियो । खेलको ५५ औँ मिनेटमा पाएको पेनाल्टीमा रियाद महरेजले सिटीका लागि बराबरी गोल गरे । यस्तै ७५ औँ मिनेटमा जेम्स फोडिनले गोल गरेपछि सिटी २–१ गोलले विजयी भयो ।

फाइनल प्रवेशका लागि अब सिटीले सेमिफाइनलमा पेरिस सेन्ट जर्मेन (पिएसजी)सित भिड्ने छ ।