काठमाडौं । डेढ वर्ष अगाडिबाट शुरु भएको कोरोना भाइरस (कोभिड–१९) को संक्रमण अझै कम हुन सकेको छैन ।

नेपालमा केही समय अघि संक्रमित र मृतकको संख्या घटेको भए पनि पछिल्लो समय संक्रमित र मृतकको संख्या बढ्न थालेको छ ।

शनिबार देशभर ३३७ जनामा कोरोना भाइरस संक्रमण पुष्टि भएकोमा आइतबार ३६७ जनामा संक्रमण पुष्टि भएको थियो । दुबै दिन १÷१ जना संक्रमितको मृत्यु भएपनि आज विहानै ३ जना संक्रमितको मृत्यु भइसकेको छ ।

बुटवलको कोरोना विशेष अस्थायी अस्पतालमा उपचार गराइरहेका तीनजना कोरोना संक्रमितको मृत्यु भएको हो ।

मृत्यु हुनेमा रुपन्देहीको तिलोत्तमा नगरपालिका–१ की ७१ वर्षीया महिला, अर्घाखाँची मालारानी–५ की ७९ वर्षीया महिला र कपिलवस्तु बाणगंगा नगरपालिका–३ का १ पुरुष रहेका छन् ।

तीनैजनाको सोमबार बिहान फरकफरक समयमा मृत्यु भएको हो ।

तिलोत्तमाकी महिलामा चैत २१ गते कोरोना संक्रमण देखिएकोमा २३ गते अस्पताल भर्ना भएकी थिइन् ।

उनको सोमबार बिहान ७ः२७ मा मृत्यु भएको लुम्बिनी प्रादेशिक अस्पतालले जनाएको छ । अस्पतालका अनुसार उनमा ज्वरो, दम र निमोनियाको समस्या रहेको थियो ।

त्यसैगरी अर्घाखाँचीकी महिलामा चैत २७ गते कोरोना संक्रमण पुष्टि भई सोही दिन अस्पताल भर्ना भएकोमा सोमबार बिहान ९ः५० बजे मृत्यु भएको हो । उनमा पनि ज्वरो, दम, निमोनियाको समस्या रहेको अस्पतालले जनाएको छ ।

कपिलवस्तुका पुरुषमा चैत २७ गते कोरोना संक्रमण पुष्टि भएको थियो । सोही दिन अस्पताल भर्ना भएकोमा उनको सोमबार बिहान ७ः१४ बजे मृत्यु भएको अस्पतालले जनाएको छ । उनमा पनि मधुमेह, ज्वरो, दम, निमोनियाको समस्या रहेको अस्पतालको भनाई छ ।