काठमाडौँ । नेपाल कम्युनिष्ट पार्टी (नेकपा) एमालेका स्थायी कमिटी सदस्य एवं पूर्वअर्थमन्त्री सुरेन्द्र पाण्डेले प्रधानमन्त्री केपी शर्मा ओलीमाथि नै कारवाही हुनुपर्ने बताएका छन् ।

आज एमाले कै नेपाल पक्षले ललितपुरमा आयोजना गरेको पत्रकार सम्मेलनमा बोल्दै पाण्डेले यसो भनेका हुन् ।

‘कार्यकर्ता भेलामा जानेलाई प्रधानमन्त्रीले कारवाही गर्ने कुरा हाँस्यास्पद हो । उहाँ आफैँले बालुवाटारमा गुट भेला गरेर गलत गर्नुभयो । अध्यक्ष चाहिँ त्यसबाट मुक्त हुँदैनन्, उहाँलाई पनि कारवाही हुनपर्छ।’

पाण्डेले प्रधानमन्त्री ओलीले नै पार्टी फुटाउन लागेको आरोप लगाए । ‘हामीलाई एमाले फुटाउन लागेको भन्ने प्रधानमन्त्री आफैँले पार्टी विभाजनको आरम्भ ओलीले नै गरेको हो’, उनले भने, ‘पुराना काम कारवाही मान्य हुन्छ भनेर विभाजन थालेका हुन् । ओलीले पहिले नेकपालाई छिन्नभिन्न बनाए, अब एमाले पनि छिन्नभिन्न गर्ने योजनामा लागेका छन्।’

कार्यक्रमा बोल्दै पाण्डेले भने, ‘पार्टी विभाजनको आरम्भ ओलीजीले गर्नुभएको हो । २८ गतेको बालुवाटार वैठकले विभाजनको बिजारोपण गरेको हो । ती सबै निर्णय फिर्ता नभएसम्म पार्टी एकता सम्भव छैन ।’

‘पार्टीको विधानले यस्ता भेला तथा राजनीतिक गतिविधि गर्ने छुट दिएको छ । भोलि र पर्सिको भेला पार्टी एकताको सुदृढीकरणका लागि हो ’, पाण्डेले भने ।

यस्तै, भोलि बोलाएको राष्ट्रिय कार्यकर्ता भेलामा २ हजार बढी नेता–कार्यकर्ता सहभागी हुने नेपाल पक्षले जानकारी दिएको छ।