काठमाडौं । पुल्चोक स्पोर्ट्स क्लब सी डिभिजन लिगमा घटुवा भएको छ ।
शहीद स्मारक बी डिभिजन लिग अन्तर्गत बुधबार भएको आफ्नो अन्तिम खेलमा नयाँबस्ती युथ क्लबसँग २–१ गोलले पराजित भएपछि पुल्चोक सी डिभिजनमा घटुवा भएको हो ।

रेलिगेसन टार्न पुल्चोकले कम्तीमा अन्तिम खेलमा नयाँबस्तीलाई हराउनु पर्ने थियो र झम्सीखेल अर्को खेलमा हार्नु पर्ने थियो । तर पुल्चोक नयाँबस्तीसँग पराजित भएपछि झम्सीखेल बी डिभिजनमै रहने पक्का भएको छ ।

पुल्चोकले ११ खेलबाट एक जितसहित जम्मा ५ अंक मात्र जोड्न सक्यो । झम्सीखेल एक खेल खेल्न बाँकी छँदा ६ अंकसहित ११औं स्थानमा छ ।

नयाँबस्तीलाई जित दिलाउन अशोक तामाङ र विवेक गुरुङले एक एक गोल गरे । पुल्चोकका शिरब लो तामाङले एक गोल फर्काए ।

खेलको १९ औं मिनेटमा अशोकले गोल गर्दै नयाँबस्तीलाई अग्रता दिलाएका थिए । खेलको ५८ औं मिनेटमा शिरबले पुल्चोकका लागि बराबरी गोल फर्काए ।

तर ६३ औं मिनेटमा विवेकले गोल गर्दै नयाँबस्तीलाई २–१ गोलको जित दिलाए ।

जितपछि ११ खेलबाट १५ अंक जोड्दै नयाँबस्ती नवौं स्थानमा रहेको छ । आज सातदोबाटोले आरसीटी तथा मध्युपुर युथ एसोसिएसनले झम्सिखेल युथ क्लबसित खेल्नेछ ।