काठमाडौँ । नेकपा एमालेको सचिवालय बैठक आज बस्दैछ ।

महासचिव ईश्वर पोखरेलले अपराह्न ४ बजेका लागि पार्टीको सचिवालय बैठक आह्वान गरेका हुन् ।

बैठकमा सहभागी हुन सबै सचिवालय सदस्यहरुलाई एसएमएस र टेलिफोनमार्फत निम्ता गरिएको छ । वरिष्ठ नेता माधब नेपाल समूह पनि आन्तरिक गृहकार्य गरेर बैठकमा सहभागी हुने तयारी गरेको छ ।

तत्कालीन एमालेको विधानअनुसार महासचिव प्रमुख रहने सचिवालयमा दुई उपमहासचिव र पाँच सचिव सदस्य छन् । बैठकमा सर्वोच्चपछि ब्युँतिएको पार्टी गतिविधि कसरी अघि बढाउने भन्ने विषयमा छलफल हुनेछ ।

फैसला अनुसार पार्टीका काम अघि बढाउने विषयमा पनि बैठकमा कुराकानी हुने बुझिएको छ ।

आज बिहान ९ बजे बस्ने भनिएको सचिवालय बैठक ४ बजेलाई सारिएको हो । तयारी नपुगेकाले बैठक स्थगित गरिएको एमाले महासचिव ईश्वर पोखरेलको सचिवालयले जनाएको छ ।

माधव नेपाल, झलनाथ खनाल लगायतका नेताहरु एमालेमै फर्किने निर्णय गर्नुअघि नै महासचिव पोखरेलले मंगलबार बिहान ९ बजे सचिवालय बैठक आह्वान गरेका थिए ।

नेपाल, खनालसहितका नेताहरु एमालेमै फर्किने निर्णयमा पुगेपछि थप तयारीका लागि भन्दै बैठक स्थगित गरिएको जनाइएको छ ।