काठमाडौं । आइतबार प्रचण्ड-माधव समूहका शीर्ष नेताहरुले संसद सचिवालयका महासचिवलाई भेटेका छन् ।

नेकपा विभाजनमा आधिकारिता नआई संसदीय दलको नेता परिवर्तन सम्बन्धी पत्राचारलाई मान्न नसकिने सचिवालयले बताएलगत्तै उनीहरुले महासचिव डा. भरतराज गौतमलाई भेटेका हुन् ।

आइतबार सिंहदरवारमा केहीबेर बसेको आफ्नो समूहका सांसदहरुको बैठकपछि प्रचण्ड, माधव र झलनाथ खनालसहितका शीर्ष नेताहरु संसद सचिवालयका महासचिव गौतमलाई भेट्न उनको कार्यकक्षमा पुगेका हुन् ।

प्रचण्ड-माधव समूहले आफुहरुले संसदीय दलको नेताबाट केपी शर्मा ओली सहित उपनेता सुवास नेम्वाङ र सचेतक शान्ता चौधरीमाथि गरिएको कारवाहीलाई मान्यता दिलाउन सचिवालयलाई दबाब दिइरहेको छ ।

११२ जना सांसदको हस्ताक्षरसहित बहुमत सांसद आफूहरुसँग रहेकाले सोही बमोजिम आफूहरुले गरेका निर्णयलाई मान्यता दिन उनीहरुले सचिवालयलाई पत्र दिँदै आग्रह समेत गरेका छन् ।