काठमाडौँ। राष्ट्रिय प्रजातन्त्र पार्टी (राप्रपा)का अध्यक्ष कमल थापाले सरकारले विप्लवसँग गर्न लागेको वार्ता सकारात्मक भएको टिप्पणी गरेका छन् ।

मंगलबार सामाजिक सञ्जाल ट्वीटरमा लेख्दै उनले राजादेखि विप्लवसम्म र राष्ट्रिय राजनीतिमा क्रियाशील सबै दल र पक्षहरूको प्रतिनिधित्व हुने सर्वपक्षीय सम्मेलन गर्न आग्रह गरेका छन् ।

अध्यक्ष थापाले कसैलाई निषेध नगरी सबै नेपाली अटाउने राजनीतिक प्रणाली निर्माण गर्न राजनीतिमा क्रियाशील सबै दल र पक्षसँग वार्ता गर्नुपर्ने बताएका हुन् ।

उनको ट्वीट यस्तो रहेको छ : ‘नेकपा (माओवादी)विप्लव समुहसँग वार्ता हुनु सकारात्मक हो । यदी साच्चै देश र जनताको हितमा काम गर्ने हो भने कसैलाई निषेध नगरी सबै नेपाली अटाउने राजनीतिक प्रणाली निर्माण गर्न राजादेखि विप्लवसम्म र राष्ट्रिय राजनीतिमा क्रियाशील सबै दल र पक्षहरूको प्रतिनिधित्व हुने सर्वपक्षीय सम्मेलन गरौँ।’