मोरङ। जिल्ला प्रहरी कार्यालय मोरङले युवक अपहरण गरी फिरौती माग्ने दुई पुरुष र एक महिलासहित तीन जनालाई पक्राउ गरेको छ ।

शनिवार जिल्लाको विभिन्न स्थानबाट उनीहरूलाई पक्राउ गरेको जिल्ला प्रहरी कार्यालय मोरङले जनाएको छ ।

पक्राउ पर्नेमा विराटनगर महानगरपालिका वडा नम्बर १६ दरैया बस्ने २० वर्षीय रोहित पण्डित, २१ वर्षीय अजय यादव र वडा नम्बर ६ रामपुर बस्ने २८ वर्षीया सन्ध्या शर्मालाई पक्राउ गरेको हो ।

विराटनगर महानगरपालिका वडा नम्बर १८ खोक्सा बस्ने २३ वर्षीय सुभाष कामतलाई अपहरण गरेर १० लाख रुपैयाँ फिरौती मागेको भन्दै प्रहरीमा उजुरी परेपछि उद्धारमा खटिएको प्रहरीको टोलीले उनीहरुलाई पक्राउ गरेको हो ।

घटनाको थप अनुसन्धान भइरहेको प्रहरीले जनाएको छ ।