काठमाडौं । विवेकशील साझा पार्टीले कोभिड-१९विरुद्धको खोप अभियानमा राज्यले ज्येष्ठ नागरिकहरूमाथि उपेक्षा गरेको भन्दै आपत्ति जनाएको छ ।

आइतबार एक विज्ञप्ति जारी गर्दै पार्टीको ज्येष्ठ नागरिक संगठनले ज्येष्ठ नागरिकहरूलाई कोरोना खोप लगाउनको लागि उपेक्षा गरिएकोप्रति आपत्ति जनाउँदै उनीहरुलाई प्राथमिकता दिन आग्रह गरेको छ ।

कोरोना भाइरस सङ्क्रमणबाट मृत्यु हुनेमा सबैभन्दा उच्च जोखिममा रहेका ज्येष्ठ नागरिकहरूलाई सरकारले खोप अभियानको तेस्रो चरणसम्ममा पनि प्राथमिकतामा नपार्नु अत्यन्त दुस्खद र दुर्भाग्यपूर्ण रहेको साझा ज्येष्ठ नागरिक संगठनका संयोजक महेनमोहन श्रेष्ठले जनाएका छन् ।

विश्वभर ज्येष्ठ नागरिकहरूलाई प्राथमिकतामा राखी कोभिड–१९ विरुद्धको खोप दिइँदै गरिएकोमा नेपालमा जेष्ठ वर्गमाथि सरकारले गरेको विभेदले सामाजिक न्याय र सुरक्षाप्रति सरकारी उदासीनता छर्लङ भएको विज्ञप्तिमा उल्लेख गरिएको छ ।