काठमाडौं । भोली आर्थत सोमबारबाट पत्रकारहरुले पनि कोरोनाविरुद्धको खोप लगाउन पाउने भएका छन् ।

सरकारले सोमबारबाट पत्रकार र कूटनीतिक नियोगका कर्मचारीलाई कोरोना भाइरसविरूद्धको खोप दिने गरेको हो ।

स्वास्थ्य सेवा विभाग अन्तर्गत खोप शाखा प्रमुख डा. झलक शर्मा गौतमका अनुसार पत्रकार, कूटनीतिक नियोग र सयुक्त राष्ट्र संघका कर्मचारी गरी झन्डै १९ हजारलाई सोमबारदेखि खोप दिने तयारी भएको छ।

त्यसका लागि उपत्यकाका चार वटा अस्पताल तोकिएको छ।

डा. गौतमका अनुसार पत्रकारहरुले सिभिल अस्पताल, कूटनीतिक नियोगका कर्मचारीका लागि गंगालाल हृदयरोग अस्पताल र टिचिङ अस्पताल अनि संयुक्त राष्ट्र संघका कर्मचारीका लागि पाटन अस्पतालमा खोप लगाउन पाउनेछन्।

शनिबार सम्पन्न पहिलो चरणको खोप अभियानमा १ लाख ८४ हजार ८५७ जनाले खोप लगाएका छन्।

जसमा स्वास्थ्यकर्मी, एम्बुलेन्स चालक, शव व्यवस्थापनमा खटिएका कर्मचारी, कैदी, सरसफाइ कर्मचारी छन्।