काठमाडौं । नेपाल कम्युनिस्ट पार्टी (नेकपा) प्रचण्ड–नेपाल समूह आवद्ध अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) का विद्यार्थीहरुले बयलगाडासहितको प्रदर्शन गरेको छ ।

प्रतिनिधि सभा विघटन विरूद्ध आइतबार काठमाडौंको थापाथलीबाट र्याली निकालि उनीहरुले बयलगाडासहित ल्याएर माइतिघर मण्डला नजिकै प्रधानमन्त्री केपी ओलीको पुत्ला दहनसमेत गरेका हुन् ।

उनीहरुले प्रधानमन्त्रीले चालेको असंवैधानिक कदमको विरोधमा बयलगाडा र ओलीको पुत्ला दहन गरेको जनाएका छन् ।

२०६० को दशकमा गणतन्त्रको लागि आन्दोलन हुँदा ओली त्यस्का बिरोधी थिए । उनले आन्दोलन गरेर गणतन्त्र आउने कुरा बयलगाडा चढेर अमेरिका पुग्ने भनेजस्तै हो भनी हल्का टिप्पणी गरेका थिए ।

उनलाई त्यहीबेलादेखि बयलगाडाको विषय ल्याएर विवादमा ल्याइने गरिएको छ । नेकपा बिभाजनपछि दुबै समूहमा गाली गर्ने होड चलेको छ ।