दाङ। राष्ट्रिय जनमोर्चाका अध्यक्ष चित्रबहादुर केसीले संसद बिघटन भारतीय योजनामा भएको आरोप लगाएका छन्।  अध्यक्ष  केसीले भारतको साथ र सहयोगमा संसद बिघटन गरिएको पनि दाबी गरे  ।

बिहीबार घोराहीमा गरेको प्रदर्शनलाई सम्बोधन गर्दै केसीले भने, ‘भारतीयको साथ र समर्थनमा केपी ओलीले संसद बिघटन गरेका हुन। ओली एक्लैले यस्तो कदम उठाएका होइनन् । भारतको सहयोगमा मात्रै यो सम्भव भएको छ ।’

नेपाललाई सिक्किम बनाउने योजना अन्तर्गत भारतले यस्तो हर्कत अपनाएको केसीले ठोकुवा गरे । नेपालले नयाँ नक्सा जारी गरेपछि नै भारतमा खैलाबैला मच्चिएर नेपालमा नयाँ चलखेल सुरु भएको उनको तर्क थियो ।

उनले थप भने, ‘लिपुलेक, लिम्पियाधुरासहित नेपालको नक्सा जारी भएपछि नै भारतले यहाँ खेल्न थालेको हो र जसरी पनि भारत  नेपाललाई सिक्किम बनाउने योजनामा छ ।

संविधान जारी गर्ने बेलादेखि नै भारतले नेपालमा प्रत्यक्ष चलखेल गरिरहेको केसीले बताए ।

केसीले भने, ‘भारतले नाकाबन्दी जारी गर्दासमेत नेकपाले राष्ट्रियताको पक्षामा अडान लिएका कारण मात्रै हामीले सरकारलाई समर्थन गरेका थियौं। अहिले केपी ओलीसहितका नेताहरुले नै राष्ट्रियता बिर्सन थाले । भारत नेपाललाई हिन्दु राज्य बनाउन चाहन्छ । शुरुमा हिन्दु राज्य र पछि सिक्किम बनाउने योजना अन्तर्गत संसद बिघटन भयो। ‘