काठमाडौँ । चिनियाँ कम्युनिष्ट पार्टी केन्द्रीय कमिटी अन्तर्राष्ट्रिय विभागका उपमन्त्री कुओ येचौको नेतृत्वमा आएको चार सदस्यीय विशेष टोलीले मंगलबार बिहान कांग्रेस सभापति शेरबहादुर देउवासँग भेटवार्ता गरेको छ ।

चिनियाँ टोली कांग्रेस सभापति देउवालाई भेट्न बूढानीलकण्ठस्थित देउवा निवासमा पुगेको थियो । छलफलमा देउवाका तर्फबाट नेता नारायण खड्का र देउवाका परराष्ट्र मामिला सल्लाहकार दिनेश भट्टराई साहभागी थिए।

उक्त भेटका क्रममा अन्तर्राष्ट्रिय विभागका उपमन्त्री कुओ येचौले कांग्रेस चीनको असल मित्र रहेको बताएको देउवाका परराष्ट्र मामिला सल्लाहकार दिनेश भट्टराईले जानकारी दिए ।

कुओले नेपालका सबै राजनीतिक दलसँग चीनले असल सम्बन्ध रहेको पनि उल्लेख गरेका थिए । उनले बीपी कोइरालाको सरकारदेखि नै कांग्रेससँग चीनको असल सम्बन्ध रहेको र त्यो अहिले पनि उस्तै रहेको बताएका थिए ।

आइतबार र सोमबार नेकपाका दुवै पक्ष (ओली समूह र दाहाल–नेपाल समूह) लाई भेटेर दुवै समूहलाई फाइदा हुने गरी मिलेर अगाडि बढ्न सुझाव दिएको थियाे।