काठमाडौं । नेपाल कम्युनिस्ट पार्टी (नेकपा) स्थायी कमिटी बैठकले संवैधानिक परिषद् सम्बन्धी अध्यादेश फिर्ता गर्ने निर्णय गरेको छ ।

बुधबार दिउँसो प्रधानमन्त्रीको सरकारी निवास बालुवाटारमा बसेको स्थायी कमिटी बैठकले मंगलबार राष्ट्रपति विद्यादेवी भण्डारीले जारी गरेको संवैधानिक परिषद् सम्बन्धी अध्यादेश फिर्ता गर्ने निर्णय गरेको प्रवक्ता नारायणकाजी श्रेष्ठले जानकारी दिए ।

नेकपा प्रवक्ता श्रेष्ठका अनुसार बैठकले संसदको विशेष अधिवेशन माग गर्दै राष्ट्रपति समक्ष नेकपा सांसदले पेश गर्न लागेको आवेदनको प्रक्रिया फिर्ता लिने निर्णयसमेत गरेकाे छ ।

बैठकमा बोल्दै नेकपा अध्यक्ष एवम् प्रधानमन्त्री केपी ओलीले अध्यादेश आएपछि मंगलबार बसेको संवैधानिक परिषद् बैठकले संवैधानिक नियुक्तिका लागि कुनै निर्णय नगरेकाे जानकारीसमेत गराएको श्रेष्ठले बताए ।

स्थायी कमिटीको अर्को बैठक पुस ५ गते बस्नेगरी स्थगित भएको प्रवक्ता श्रेष्ठले बताए । पूर्व निर्धारित पुस ५ गतेको केन्द्रीय समिति बैठक भने पुस १० गतेसम्मका लागि सारिएकाे प्रवक्ता श्रेष्ठले जानकारी दिए ।